Agenda

Février 2015
Dim Lun Mar Mer Jeu Ven Sam
1
2
3
4
5
6
7
8
9
10
11
12
13
14
15
16
17
14:00
ATUR
Date :  mardi 17 février 2015
18
15:00
SAINT GEYRAC
Date :  mercredi 18 février 2015
19
13:30
Bar du Centre à LA DOUZE
Date :  jeudi 19 février 2015
20
20:00
ATUR
Date :  vendredi 20 février 2015
21
14:00
SAINT FELIX DE REILHAC
Date :  samedi 21 février 2015
22
23
24
25
26
13:30
Bar du Centre à LA DOUZE
Date :  jeudi 26 février 2015
27
28
 

Echos de la Sainte Estelle

 

Castilhonés 2010

Organizar una Santa Estela es pas una causa aisada. A la debuta per de las gens que coneisson res d’aquesta manifestacion, que son pas felibres e qu’an jamai assistat a ’quelas festivitats es una causa plan dificila a aprendre.

E per una comuna d’Òlt e Garona pròcha del Peiregòrd (mens de 7qm) la manifestacion que ven a l’esperit als gens qu’avem rencontrats es la felibrejada dau Bornat qu’es tanben una gròssa organisacion mas qu’es plan diferenta.

Per una Santa Estela, qu’es lo congrés del Felibrige, cal comptar cinc jorns a recebre del monde amb un punt culminant lo dimenge amb lo passa carrièra dels gropes convidats de las Mantenenças e los venents del Peiregòrd e d’Òlt e Garona.

Ça que la, a la debuta los conses de las comunas èran un pauc trastejants malgrat lo sosten actif de membres del Felibrige e la preséncia del president dau Bornat . Mas lo conse de Castilhonés èra plan favorable e lo Conselh General nos a totjorn sostenguts.

Lo comitat composat d’amics s’es botat en plaça amb a son cap Frederic Reynaud apres un temps de reflexion e de consultacion e a fach un plan bon trabalh.

Cal felicitar lo Comitat d’Organisacion en totalitat per aver menat la barca emb dexteritat e competéncia.

A sagut prendre en compte la realitat d’aquesta fèsta que en defòra de l’amassada annadièra del Felibrige es en realitat l’escasença per la populacion d’un ranvers de rescontrar sa cultura pròpia e de realizar son apartenéncia a una lenga qu’es encara viva dins quel canton d’Òlt e Garona e tanben a un país que vòl viure.

L’escasença per la municipalitat d’afirmar aquela preséncia per la pòsa de panèus d’intrada de comuna en lenga nòstra. Castilhonés tòrna trobar son escritura d’autres còps. Mas tanben la reconeissença de la preséncia e de l’accion del Felibrige emb l’inauguracion de la carrièra Frederic Mistral.

Aquela preséncia de nòstra cultura s’es trobada tanben dins la programacion de las festivitats que viran totjorn dins l’organisacion d’una Santa Estela.

En prumièr aquò es la preséncia d’occitanofònas del país coma Marcèu Esquieu dins sas fabuladas emb Teresa Duverger que donan una dimension occitana a de las fablas de La Fontaine revisitadas.

Esquieu que fuguèt lo creator de l’EOE (Escòla Occitana d’Estiu) emb d’autras coma Joan Rigouste, el tanben present per parlar de toponimia dels país d’oc, qu’es un especialista avisat.

Glaude Pons president de Radiò 4, la Radiò dels quatre cantons qu’es vengut nos parlar de las bastidas e Andrieu Bianchi per nos parlar de “La Rambolanta de Nerac”

Aquelas programacions an fach crida a dels artistas vesins : lo grop de cantaires 2B2R de Cáurs que nos an ofert una polifonia de cants tradicionaus occitans d’aicí o d’endacòm mai. Peiraguda lo grop mitic del Peiregòrd qu’a festejat l’an passat sas trenta annadas d’existéncia e qu’a claufit la plaça de las Cornièras. Son repertòri a encantat los espectators venguts, encara un còp, escotar los ancians succès mas tanben qualquas noveltats. Los contaires Joan Bonnefon e Danièl Chavaroche dins las seunas composicions sus lo Rugbi “Sem pas venguts aicí per en prendre” an amusat lo mond vengut partejar lor umor e lors malparadas. Damatge qu’aquela serada fugessa en francés tota.

Lo diluns al ser es estat programat lo film “Las sasons” qu’es una expression de femnas en lenga d’òc, sus la lenga e sus la vida vidanta a la seguida de l’enquesta sus los darrièrs locutors naturals en lenga nòstra en Peiregòrd verd. Avem agut la suspresa de veire tanben un pichon film en occitan,”La galeta”, realizat per la classa mairala de l’escòla de Castilhonés menada per sos regents Marylin e Bertrand Malifarge. Es un pichon joièl de composicion e d’espontaneitat!

Aquels escolans avián dubert las festivitats lo divendres après miegjorn emb de cants e de las danças, entrenats per lo grop dels Trobadors de Guiana. Una dubertura plan escarabilhada sus nòstra cultura e nòstra lenga.

La cultura nòstra dèu pas se limitar a l’expression cantada moderna de nòstra lenga. Los costums e las danças tradicionalas fan tanben partida de nòstra patrimòni. E los gropes (dich focklorics) que los practican emb rigor son dignes d’interest. Devem pas se polhar l’un l’autre. La Santa Estela es, benlèu, l’escasença de los far se rencontrar e s’apreciar?

Los gropes convidats de las Mantenenças an portat en mai de la lenga emb lors cants, lo movement emb lors danças, la color emb lors vestits diferents e mirgalhats e lors animacions musicalas.

Lo passa-carrièra de Castilhonés amb 19 gropes a laissat un plan bon imatge d’aquela festa sus la populacion.

A la Cor d’Amor, an animat la plaça de l’Ormiera ont un public nombrós aviá envasit las cadièras a l’ombra d’un solelh generós. Felicitacions a tots per la tenguda dels costums e la presentacion de las seunas tradicions malgrat la calor d’aquela jornada.

Cal pas oblidar que la Santa Estela es lo congrés del Felibrige e que tot del long d’aquels cinc jorns se son tengudas de las sesilhas importantas per la vida del Felibrige. Lo burèu general lo divendres ser, lo consistòri lo dissabte aprés miegjorn e lo congrés lo diluns matin.

2010 èra annada ont se renovelava lo capolier del Felibrige. Es En Jaque Mouttet que fuguèt tornat elegit. La Mantenença felicita lo novèl capolier de son eleccion e l’assura de son sosten per anar de l’avant per que lo Felibrige siá mai present dins nòstra Mantenença e per aplicar las decisions presas.

Felicitacions als dos majorals novelaires : Pau Valière sendic de la Mantenença del Lemosin e l’abat Miqueu Desplanches curat-decan de Selon de Crau e Grans, que son estats elegits a la Santa Estela de Castilhonés.

Per acabar, remerceji plan la comuna de Castilhonés e son conse Pierre Sicaud d’aver gausat se lançar dins aquela organisacion, plan ajudat per la comunautat de comunas e sa presidenta, las comunas del canton e lors conses.

Remerceji tanben lo Conselh General d’Olt e Garona e lo Conselh Regional per nos aver ajudats e en particular lo Conselher general Christian Ferullo que a seguit e a participat a ’quela organizacion

Francès Pontalier

Sendic de la Mantenença

Majoral del Felibrige

 

En ligne

Nous avons un invité et aucun membre en ligne

Venir nous voir



Address:
City:
State:
Zip: